កម្ពុជាជាប់ចំណាត់ថ្នាក់ លេខ៣ នៃការប្រកួត កីឡាហុកគីលក្ខណៈ មិត្តភាពអន្តរជាតិ

កម្ពុជាទទួល បានចំណាត់ថ្នាក់ លេខ៣ ក្នុងចំណោម៤ ប្រទេសចូលរួមមាន ម្ចាស់ផ្ទះកម្ពុជា ថៃ ជប៉ុន និងអង់គ្លេស ដោយ៦ប្រកួតរបស់ កម្ពុជា ឈ្នះ២ ស្មើ១ និងចាញ់៣ ក្នុងការប្រកួតកីឡាហុកទាំងពីរថ្ងៃ។
ការប្រកួតនេះបានចាប់ផ្តើមឡើងនៅថ្ងៃទី១៨ ដល់ថ្ងៃទី១៩ ខែកុម្ភះ ឆ្នាំ២០១២ នៅឯទីលាន Vietcam ស្ថិតនៅក្នុងសង្កាត់កាកាប ខណ្ឌដង្កោ ដែលនេះជាលើកទី១ហើយសម្រាប់កម្ពុជា ដែលបានធ្វើជាម្ចាស់ផ្ទះ ។សម្រាប់ការប្រកួតនៅថ្ងៃទី២ កម្ពុជា ឈ្នះ២ និងចាញ់១ ដោយ១ប្រកួតដំបូងបានចាញ់ក្លឹប Yamato របស់ជប៉ុន ដោយ លទ្ធផល២ទល់នឹង៥ តែបន្ទាប់មកបានឈ្នះអង់គ្លេស៣ទល់នឹង២ និងបានយកឈ្នះថៃក្នុងលទ្ធផល ៤-២ ចុង បញ្ចប់ នៃការប្រកួត ចំពោះលទ្ធផល៣គូទៀតគឺ ថៃស៊ីអង់គ្លេស៩-៥, ជប៉ុន៤ស្មើជាមួយអង់គ្លេស និងថៃឈ្នះ ជប៉ុន ៤ទល់នឹង៣។
ការប្រកួតវិលជុំទាំង២ថ្ងៃនេះ ក្លឹបរបស់ថៃទទួលបានលេខ ១ (ឈ្នះ៥ និងចាញ់១) ជប៉ុនលេខ២(ឈ្នះ ២ ស្មើ ២ និងចាញ់២) កម្ពុជាលេខ ៣ (ឈ្នះ២ ស្មើ១ និងចាញ់៣) និងអង់គ្លេសទទួលបានលេខ ៤ (ឈ្នះ១ ស្មើ១ និង ចាញ់៤)។
ហើយក្នុងនោះលោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាហុកគីកម្ពុជាដែរនោះបានឱ្យដឹងថា សព្វថ្ងៃនេះសហព័ន្ធកីឡាហុកគីកម្ពុជា មានក្លឹបចំនួនបី ដែលជាសមាជិករបស់ខ្លួន ហើយកីឡាប្រភេទ អូឡាំពិកមួយនេះ ត្រូវបានគេនិយមលេងខ្លាំងបំផុតនៅប្រទេស ចិន អង់គ្លេស អូស្រ្តាលី យេម៉ែន ហូឡង់ អាលឺ្លម៉ង់ ប៉ាគីស្ថាន និងឥណ្ឌា។
បន្ទាប់មកលោក Rana Asif Maqsood ប្រធានគ្រូបង្វឹកកីឡាហុកគីកម្ពុជា បានប្រាប់ឱ្យដឹងផងដែរថា នេះគឺជាព្រឹត្តិការណ៍ប្រចាំឆ្នាំដែលធា្លប់បានធ្វើអស់រយៈពេល១០ឆ្នាំមកហើយ ក្នុងនោះប្រទេសដែលចូលរួមញឹកញាប់ជាងគេគឺជប៉ុន៕